Memoria

Donostia Turismoa 2020an iritsi zen Donostia Visit-Bizi 2017-2021 Turismoko Gida Planaren azken txanpara, eta datuak aldekoak izan dira 2020 arte, helmugaren desestazionalizaziorantz, nazioartekotzerantz eta jasangarritasunerantz aurrera egiteko ahaleginean. Horrela, lortu egin da Donostiaren kalitatezko marka turistikoa sendotzeko eta haren benetakotasuna zaintzeko helburua.

Baina covid-19aren krisiak gogor jo du munduko eta, jakina, Donostiakoa sistema turistikoa. Turismoak, 2020an, jokabide arau berriekin eta mugikortasun mugekin bizi behar izan du, eta, bereziki, distantzia fisikoaren eskakizunarekin eta bilera publikoen mugekin. Horiek ondorio suntsitzaileak izan ditu sistema turistikoaren zati handi batean. Egoera horrek eragin handia izan du azpisektore turistiko guztietan, eta zenbait unetan jarduera geldiarazi ere egin da.

Turismoaren ikuskera sistemikoak eta berori zeharkakoa izateak aldaketak ekarri ditu, eta aldaketa horiek eragin handia izan dute bidaiarien portaeran. Horregatik, Donostia Turismoak etengabe egokitu du bere lan plana eta, kasu batzuetan, xede genituen merkatuak aldatu ditu.

Egia da Visit-Bizi 2017-2021 Gida Planak ezarritako estrategiak baliozkoa izaten jarraitu duela egoera honetan, baina kontuan hartu behar da inguruko aldaketetara etengabe eta iraunkorki egokitzearekin lotutako konplexutasun handiak justifikatu duela turismoaren berrikuntza estrategikorako prozesu bati heltzearen beharra, helmugaren kudeaketaren ikuspegitik.

Ildo horretatik, Donostiako Turismoaren Gida Plana egokitu da, eta, bertan, besteak beste, ingurune politikoaren, ekonomikoaren, soziokulturalaren, teknologikoaren, ekologikoaren eta legalaren faktoreak sakon aztertzeko tresnak jaso dira, ingurunetik datozen mehatxuak eta aukerak identifikatzeko eta helmugaren posizionamenduan lagunduko duten ekintza berriak planteatzeko.

Egoera berria konplexua bada ere, Donostia Turismoak egunero jarraitzen du lanean, elkartutako enpresekin eta sektore turistikoari lotutako erakunde eta enpresa guztiekin lankidetzan eta donostiarren partaidetzaz, inoiz baino indartsuago aurrera jarraitzeko eta etorkizunari begiratzeko.

Aurreko urteetako memoriak